Nýggjur Varði komin út

Ársins seinna hefti av Varðanum er komið út.  Mentanarritið er sent til haldarar og verður í bókasølum í næstu viku.

Millum greinarnar hesaferð eru portrettsamrøða við Tórodd Poulsen, grein um býarvøkstur í Havn eftir Erland Viberg Joensen, grein um føroyavinin John West eftir Óla Olsen og fyrilestur um norska tilknýtið hjá Hans Andriasi Djurhuus eftir Hanus Kamban. Tvær heiðursgreinar eru, hesaferð um rithøvundarnar Carl Jóhan Jensen og Tórodd Poulsen, sum báðir fylla 60 í ár.

“Framtíðin er kvennkyn” er heitið á myndaúrvali, sum toymið handan Damudomi hevur sett saman. Toymið er kvinnað av Sunnevu Háberg Eysturstein, Christu Reynheim, Turið Nolsoe og Solveig Hanusardóttir. Ein brellbiti er eisini úr feministiskari ritroynd eftir franska heimspekingin, Hélène Cixous. Turið Nolsoe hevur týtt, og ritroyndin kemur út sum bók á vári 2018 í samband við nýggjan leik hjá GUT/Production.

Skaldskapur er eisini í hesum Varðanum. Lív Maria Róadóttir Jæger hevur tvær yrkingar, Øssur Johannesen hevur týtt fimm yrkingar eftir Gustaf Munch-Petersen, og Henný Rógvadóttir og  Beinir Bergson hava hvør sína yrking. Og so eru stuttsøgur eftir Helenu Joensen, sum vann aðru virðisløn í stuttsøgukapping hjá Glasi fyrr í ár, og Nanný Jacksdóttir Toftegaard, Sørine Stenholt og Debora Hansen Kleist.

Harumframt eru níggju ummæli. Zakarias Wang ummælir orðabók, Agnar Jógvansson ummælir stuttsøgusavn, Vár í Ólavstovu ummælir yrkingasavn, Sámal Soll ummælir film, Sólfinn Hansen ummælir skaldsøgu, Tórður Jóansson ummælir yrkisbók og Øssur Johannesen ummælir fløgur.

Permumyndin á Varðanum 84, 2 er skurðmynd úr nýggjum málningi eftir Anker Mortensen. Ritstjóri er Dorit Hansen. Føroyaprent hevur sett upp, prentað og bundið inn. Til ber at tekna seg sum lim á www.mentanarrit.fo.

Nýtt hefti av Varðanum komið út

Varðin bind 84, hefti 1 er útkomin við greinum og yrkingum, stuttsøgum og ferðafrásøgnum, endurminningum, samrøðum og nógvum ummælum.

Millum greinarnar hesuferð er portrettsamrøða við Sólrún Michelsen eftir Dorit Hansen, heiðursgrein til Kringvarp Føroya eftir Eyðun Johannesen, endurminningar úr Sundalagnum eftir Alfred Gullbein, ritroynd um at skriva og um ikki at vilja bjarga heiminum eftir Kim Simonsen, fyrilestur um autofiktión í føroyskum skaldskapi eftir Lydiu Didriksen, tíðargrein um kritiskan kapital og almenni í Føroyum eftir Rólant Dam og úrval av myndum úr tarabók eftir H.C. Lyngbye, sum Ole Wich hevur granskað.

Við í Varðanum eru eisini tvær stuttsøgur og tríggjar yrkingar umframt ummæli av bókini 2000 – tá Føroyar skuldu loysa eftir Sjúrð Skaale, skaldsøguni Bommhjarta eftir Jóanes Nielsen, týðing Tórð Jóanssons av meistaraverkinum Heart of Darkness, krimiskaldsøguni Drotningarringurin eftir Jógvan Isaksen, yrkingsavninum Sunnudagsland eftir Sissal Kampmann og týðing Paula Nielsens Jákupslon av víðagitnu skaldsøgu Alaa Al Aswanys. Síðst í Varðanum borðreiða Tórður Jóansson og Durita Holm við hvør sínari ferðafrásøgn úr ávikavist Pakistan og Spania.

Permumyndina eigur listamaðurin Tummas Jákup Thomsen. Dorit Hansen hevur ritstjórnað og Føroyaprent hevur sett upp, prentað og bundið inn. Varðin er til keyps í bókahandlunum, men tað ber eisini til at tekna seg sum lim á www.mentanarrit.fo.

Hósdagin 8. juni kl. 16 verður ársaðalfundur í Bókmentafelagnum Varðin. Fundurin verður á hølunum hjá Føroya Prenti við Hoyvíksveg 59 í Havn. Allir núverandi og komandi limir eru vælkomnir. Í nevndini hjá Varðanum sita Zakarias Wang, formaður, Óli Jacobsen, kassameistari og Jon Hestoy, nevndarlimur.